سارة الطباخ: «شيرين اتضربت واتسحلت من بيتها الفجر حافية من 10 أشخاص مع أخوها»
خرجت المنتجة سارة الطباخ في تصريحات جديدة حول أزمة الفنانة شيرين عبدالوهاب الأخيرة ودخولها المستشفى، واتهام شقيق شيرين لها وللفنان حسام حبيب بالتسبب في إدمانها.
وكشفت سارة الطباخ خلال مداخلة هاتفية لها مع الإعلامي عمرو أديب في برنامج «الحكاية» المذاع على قناة إم بي سي مصر، أنها قد تلقت رسالة من حسام حبيب طليق الفنانة شيرين عبدالوهاب في تمام الساعة الثالثة فجرًا، يخبرها فيها أن شيرين عبد الوهاب تواجه مشكلة كبيرة.
وتابعت سارة الطباخ: «بعدها كلمته قاللي إن شيرين اتاخدت من بيت كانت مقيمة فيه عنوة بعد الضرب والسحل وأخذوها بملابس المنزل، بدون حذاء، وإنها مختفية من يوم الخميس، وقلت له هدخل معايا المستشار ياسر قنطوش لأنه هو المحامي بتاعي وبتاع شيرين، ومش أنا اللي معرفة شيرين على المستشار ياسر، شيرين عرفته عن طريق الفنانة زينة».
وأضافت: «حسام حكى للمستشار القصة وقاله إنها مختفية من يوم الخميس وإنه عرف إنها موجودة في مكان ما في مستشفى بالنزهة رحنا المستشفى في النزهة، عشان نطمن عليها، قالوا لنا مفيش حد موجود بالاسم ده، واتأكدنا إنها داخل المستشفى لكنهم رافضين الاعتراف بذلك، كل هدفي كان الاطمئنان عليها، لو طمنونا كنا هنمشي وتمام».
واستكملت: «حسام قاللي إن شيرين أُخذت عنوة من المنزل واتضربت واتسحلت من قبل أخوها و10 أشخاص موجودين في البيت، وأخدها على المستشفى من يوم الخميس، شقيق شيرين بيساعد على تشويه صورة شيرين، شيرين ست واعية وقوية، شيرين طيبة وعاطفية جدًا وحساسة لكن متسرعة جدًا، من أطيب وأجدع الناس، وخيرها على الكل وأولهم أخوها محمد».
واختتمت: «ليس لدي أي مشاكل مع شيرين أنا رحت حبًا فيها وخوفًا عليها، وعايزة أطمن عليها، لكن الكلام اللي قيل إمبارح يقلل من شيرين، إحنا كلنا لينا في شيرين».
