حسام حبيب: «عندي عقدة بعد اللي حصل مع شيرين.. وقاعد في بيتي خايف» - فيديو
كشف الفنان حسام حبيب كواليس حادث التعدي على شيرين، وذلك في مداخلة هاتفية ببرنامج «الحكاية»، مع الإعلامي عمرو أديب على قناة إم بي سي مصر.
حيث قال:«التسجيل المنتشر كان مكالمة خاصة جدا بيني وبين صديق وكنت وقتها متخانق مع شيرين، وأنا كمان بكتشف الناس اللى حوليا زي ما شيرين بتكتشف الناس اللي حوليها».
وتحدث الفنان حسام حبيب عن أزمته مع شيرين عبد الوهاب، مؤكدًا أن أهلها هم السبب في إنهم يوصلوها للحالة دي والصلح المرة دي كان صلح مبني على الصداقة فقط.
وكشف حسام حبيب تفاصيل تعدي شقيق شيرين عبد الوهاب عليها، قائلًا: أخو شيرين عبد الوهاب مكنش بيكلمها، أنا لقيت فجأة ناس داخلة علينا بمطاوي، وأول مرة أشوف دكاترة معاهم مطاوي، واكتشفت انه كان جايب صحابه، شوفتها وهي بتتسحب في شعرها ونازلة حافية ببجامة، وبتجري بالعربية وبتقولي الحقني.
وأضاف حبيب، قائلًا: " المشادات والخناقات استمرت نص ساعة مع أخوها، وأخدوا تليفوناتنا، وكانوا ناس داخلين عارفين هما بيعملوا اي، وشوفت منظر عمري ما هعرف أنساه طول حياتي، وأنا بقى عندي عقدة، مش شيرين عبد الوهاب اللي يتعمل فيها كدة، وفي واحدة هي اللي كانت عارفة اني جوة وهي اللي أخدت من شيرين المفتاح والموضوع كان مرتب".
