بهاء سلطان: «الشيخ محمد عمران فرق معايا في الغناء»

قال الفنان بهاء سلطان إن أغنية "قوم أقف" كانت مفاجأة بالنسبة للناس نظرًا لنوع المزيكا والكلمات ولكن فى النهاية لاقت نجاحًا كبيرًا، مؤكدًا أن الفنان تامر حسنى كان يصر على تقديمه الأغنية.

وأضاف خلال لقائه ببرنامج "أنغام" الذى تقدمه الفنانة أنغام بقناة "دى إم سى": "الـ7 سنين اللى فاتوا كنت بحب أسمع موسيقى تركى والشيخ محمد عمران، خاصة ابتهال يا سيد الكونين".

ولفت: "قبل الأزمة اللى مريت بيها الفترة اللى فاتت كنت بسمع أم كلثوم ومحمد عبد الوهاب، وأخويا الكبير الله يرحمه كان بيقول لى اسمع عمك عبده الإسكندرانى صوته حلو، وفى الثانوية جبت 58% وقال لى قدم تربية موسيقية علشان انت صوتك حلو ولما دخلت الكلية اختارونى فى فرقة عبد الوهاب بالكلية وفهمت يعنى إيه النزعة والجواب، والدكتور رامى كامل علمنى البيانو وعلمنى برضو إزاى اطلع صوتى كويس".

وأشار: "الشيخ محمد عمران فرق معايَ فى الغناء، وجمال صوتى وحلاوته من كتر ما سمعته، وفى أزمتى لما كنت بسمع ابتهال فكم لله من لطف خفى، كنت بقرب لربنا وحياتى بتتظبط وأزمتى بتتفك وتنتهى".

وعن أغنية “قلبك يا حول الله" من ألحان تامر عاشور، علق بهاء سلطان: "كنت محظوظ فيها، ودايمًا ربنا بيبعت لى ناس حلوة تختار لى الصح".