في أول ظهور بعد العفو الرئاسي.. طارق النهري: «كان بيتقالي في السجن يا أستاذ»
ظهر الفنان طارق النهري في ضيافة برنامج صاحبة السعادة، الذي تقدمه الإعلامية الكبيرة إسعاد يونس على قناة Dmc، وكشف خلال اللقاء تفاصيل فترة تواجده في السجن.
قال طارق النهري عن لحظة خروجه من السجن: "توهت، أول ما خرجت لفيت الشوارع كلها وكم الإنجازات اللي حاصلة في مصر شيء مبهر، واللي بيحصل ده لو مكنش حصل في الوقت ده كنا هنكون دولة متخلفة".
وأضاف طارق النهري خلال لقاءه: "أنا شوفت عالم وقابلت ناس مكنتش متوقعهم 90% منهم سوابق، وهناك في السجن كانوا بيتعاملوا معانا ياحترام وبيتقالنا يا أستاذ فلان، وكنت بحاول أوائم ظروفي جوه لإني كنت ما بين سياسي تقيل وجنائي".
وتابع:" بعد خروجي من السجن حياتي اتقلبت 180 درجة، لأني اتعاملت مع ناس مختلفة، واتقبض عليا لأن اسمي اتحط في مجموعة معينه فيه منهم أخطأ وشيلنا الليلة معاهم ولما صدر الحكم كنت في حالة مش طبيعية، وأما دخلت السجن اتعلمت فلسفة تانية خالص، ولما جالي قرار العفو كان حلم بعيد ومكنتش متوقعه".
وكشف طارق النهري عن بدايته الفنية، حيث قال: "دخلت صدفة وبدأت الحكاية تحلو معايا والعجلة تدور، وكان ليا زميل كنا مع بعض صديق ابتدائي واعدادي وثانوي، وكنت بروح أقف عند كواليس في المسرح كانو بيقولولي متتكلمش، كان زمان في حد يخلينا نشتغل بجد، والحاجات دي بقت دلوقتي محرمات، مع إن محدش بياخد رزق حد، الدنيا جميلة".
