فريدة سيف النصر تطلب من الجمهور دعم منة شلبي في محنتها

حرصت الفنانة فريدة سيف النصر على توجيه رسالة لجمهور الفنانة منة شلبي، وذلك بعد اتهامها بحيازة جوهر الحشيش المخدر بقصد التعاطي.

وعلقت فريدة سيف النصر على ما حدث من خلال حسابها الشخصي بموقع التواصل الاجتماعي فيس بوك، حيث كتبت: "منة شلبي.. منة الله قلبي عندك يابنتي.. كل ما اقرأ خبر.. لنا الرحمة والرأفة منك يارب.. البوست بيسألك إيه اللي في عقلك علشان نكتبه.. الحقيقة هو مش في عقلي هو في قلبي وروحي وماعرفش اسكت طبيعتي كده خلقة ربي وتربية لوزه أمي".

وتابعت: "الأول هاطلب منكم الجدعنة المصريين جدعان والكلمة بتأثر بيسموها الرأي العام والسؤال.. الفنان لما يبقي في محنة بيحتاجكم أوي أنتم عملتوه بعد ربنا وهو بيبقي على أعصابه خايف تزعلوا عايز يرضيكم.. فهطلب منكم بلاش قسوة وحياة سيدنا النبي معلش".

وأضافت: "افتكروا لنا أي مشهد ضحككم وإنتم زعلانين أو رواية كانت واقعية كأنكم عيشتوها.. خلوا الحب اللي كان جواكم يهدي مايثورش".

واستكملت: "أيوة بنغلط كلنا بنغلط إحنا بشر فينا اللي بيكمل غلط وفينا اللي بيرجع من أولها وفينا اللي بينصحوه غلط ويغرقوه منهم لله.. وفينا اللي قدوته بهدلته وعقدته ومش شايف حياته الحلوة لأن جواه حياة شافها يتمنى إنه مايفتكرهاش بس مابيقدرش.. ومش بيصدق إن الناس بتنسى.. هو شايف نفسه اللي عارفها هو بس".

وتابعت: "أكيد كلنا جوانا حاجة فيها آلام وذكرى مش عايز يفتكرها ولا حد يفكره بيها.. فما بالك لو فنان مشهور نصيبه كده أو نصيبها.. ماتبصوش على الابتسامة.. بصوا جوه العين في مشاعر صعبة مكتومة تخلي العين دامعة وتفهمها وفي عين باردة بلا تعبير لكن تدعي التعبير.. العين دي مش شايفة الناس بتبص لها ازاي بإعجاب وحب هي شايفة فقط حالة ماكانتش تتمنى تكون هي دي حياتها ولا تقدر تتخلى في نفس الوقت عن أقرب الناس.. مشاعر متضاربة تحسسه بأنه قليل وهو مايعرفش أنه بقي مهم وماضيه مايهمش حد.. الصراع ده بيخليه يهرب.. فبيهاجر.. فبيغير كل اللي حواليه ويبدأ من جديد.. وفي اللي صحاب السوء يقولوا له زي أفلام زمان خد لك كاسين تنسى.. أو نفسين وكبر دماغك منهم لله شياطين الإنس".