أماني التونسي تكشف قصة مسلسل «بقينا اتنين» قبل انطلاق عرضه

ينتظر صناع مسلسل بقينا اتنين عرضه ابتداء من يوم 2 ديسمبر من الشهر المقبل على شاشة "ON"، والعمل من بطولة رانيا يوسف وشريف منير، ومن تأليف أماني التونسي، وإخراج طارق رفعت.

ومن ناحيتها كتبت السيناريست أماني التونسي على حسابها الشخصي بموقع التواصل الاجتماعي فيس بوك: "مسلسل #بقينا_اتنين من المسلسلات الغالية جدًا على قلبي #بقينا_اتنين بيتكلم عن صدمة ما بعد الانفصال بس مش أي انفصال ولا أي طلاق لا ده انفصال وإنت بتحب الطرف التاني عادي تنفصل عن حد بتحبه وكان شريك حياتك بس لما تكتشف إن ده مكانش حب وإنك كنت شايفه بعيون قلبك اللي دايمًا بتبقى بتحكم غلط".

وتابعت: "لأن كل طرف بيحب التاني بطريقته يعني طرف بيدي للطرف التاني العطاء اللي خلاه أناني اتعود ياخد وبس بعد ما كان بيدي في الأول لغاية ما خلاص بقى الطرف التاني مضمون وأكبر ضمان هو الجواز اللي بيخلي كل طرف فاكر إن التاني بقى ملكه ومش محتاج أي مجهود إنه يحافظ ع العلاقة وخصوصًا لو في أولاد".

وأضافت: "كل واحد بيحب التاني بطريقته دي أكبر مشكلة لو إنت بتتحب بالطريقة اللي مش بترضيك ومش بتكفيك من هنا بتبدأ الخطوات السريعة أو البطيئة للانفصال وهنا بقى السرعه والبطء بتعتمد على دفع كل طرف في العلاقة لإنهاء العلاقة اللي بتستنزف كتير أوي من روحك، وكان هنا دور الجلسات النفسية لترميم أو إنهاء العلاقة، وده من أكتر الأجزاء اللي بحبها بسبب دراستي اللي فادتني في المنطقة دي في المسلسل وهو أنك بتناقش روح وأفكار ونفسية كل طرف وبتشوف كل واحد شايف التاني إزاي أتمنى إنه يعجبكم وإنه يبقى إضافة لأعمالي اللي هسيبها في الدنيا من بعدي".