شيرين تثير الجدل في أول ظهور لها بعد تصريحاتها عن حسام حبيب «صور»
تداول رواد مواقع التواصل الاجتماعي خلال الساعات القليلة الماضية صور للفنانة شيرين عبدالوهاب، ظهرت فيها أثناء قضاء عطلتها الصيفية في الساحل الشمالي.
جدير بالذكر أن الصور التي يتم تداولها هي أول ظهور للفنانة شيرين عبدالوهاب، بعدما أثارت الجدل خلال الأيام الماضية بتصريحاتها عن طليقها المطرب حسام حبيب، والتي قالت فيها:
«عاوزة أستغفر ربنا على الكذب اللى كذبته عشان أخلى صورة إنسان تبقى كويسة، وأنا كذبت ودى أكتر حاجة ربنا مبيحبهاش.. حسام حبيب ضربني وسحلني على الأرض وهو اللي حلق لي شعري"، وأنا من القلعة وممكن أروح أهد عليهم العمارة اللى قاعدين فيها، وأنا عاوزة حقي منه».
مداخلة شيرين عبد الوهاب
وجاء في تصريحات شيرين عبد الوهاب: «كذبت فى حاجات كتيرة أوى لأنى بنت أصول وكنت عاوزة أرفع صورة إنسان ممكن يروح فى يوم من الأيام يتجوز من عيلة تانية، ولو كنت قلت كلام وحش وقتها مكنش هيعرف يتجوز، وأنا نفسى يتجوز ويبعد عنى وأخلص منه».
وفي مداخلة شيرين عبد الوهاب مع لميس الحديدي قالت: «أنا ست قاعدة فى أمان الله مع بناتى، بقالنا 4 سنوات شايفين الويل، سافرنا الساحل وقلنا نقعد أربع أو خمس أيام ونرجع مبسوطين وتتحسن نفسية البنات ونفسيتى، ومكناش بنخرج ومكناش عايشين تقريبًا والبنات ماكانوش بيعرفوا يقعدوا معايا، لأنى كنت عايشة مع زوج مش بيشتغل تقريبًا، وكنت محبوسة 24 ساعة فى أوضة نومى مش بعمل حاجة، قاعدة بس»
وتابعت: «أنا غلطت فى حق نفسى، وكنت فاكرة إنى بحافظ على بيتى لكنى اكتشفت إنه ماكنش بيت، كانت عيشة فئران أو مصيدة أنا كنت زى الفار اللى بيدخل المصيدة ياكل حتة جبنة، كنت عايشة مع راجل مش بيشتغل ولا بيخرج ولا بيشوف أهله ولا أصحابه وكل همه حب الامتلاك، ومع ذلك فضلت جنبه، وهو لا يعرف إلا فكرة حب الامتلاك، وصبرت لأنى كنت بحاول أنجح الحب ده ومكنتش بحب اتهزم وأنا بطبعى أكون خدامة الرجل اللى أعيش معاه».
واستطردت قائلة: «حسام سرق العربية من قدام البيت.. سرق العربية مستغلا تواجدى فى الساحل.. أنا خرجت من الجوازة دى بالوكسة والحسرة.. ده إنسان خطر، لازم أروح اتعالج من آثاره عليا كنت متكفلة بمصاريف بيته التانى، طول عمره مابيشتغلش، وأهله باصين لى فى كل حاجة.. لو عملت أغنية ناجحة أمه هتقول اشمعنى ابنى.. حسام حبيب عاطل بالوراثة».
وقالت: «حسام حبيب طلب 10% من أرباح شغلى.. أنا اتجوز قرد وما أرجعش ليه تانى.. ومش عايزة أعرف حد اسمه حسام تانى أنا أستاهل الضرب عشان طلعت قولت مابيخدش منى فلوس.. أنا آسفة للناس عشان كدبت عليكوا، وهتعب عشان أرجع تانى شيرين اللى ضيعتها.. وعلاقتى بحسام عمرها ما كانت حب».
وأضافت: «عيالى كانوا هيضربوا بالرصاص، قبلها بيومين قاعدين فى الأوضة، طلع من الدرج علبة فيها رصاص.. راح مدينى رصاصة وقال لى خد دى منى هدية الحمد لله إنى لسه عايشة، وحسبى الله ونعم الوكيل.. احنا اطلقنا لما قصيت شعرى (بائن)، واللى حصل بعد ما هديت من الكارثة حسيت إن أنا مش قادرة أستغنى عنه وأديله فرصة تانية.. خناقات فيها ضرب وسحل على الأرض وشتيمة عمر ما إنسانة تقبلها على نفسها.. واتنيلت على عينى ورجعت فقولنا ندى فرصة تانى وشروط.. وبناتى فى بيت تانى ونشتغل.. لحد ما ابتدت الوعود تتلاشى والمشاكل ترجع تانى وقلة الأدب ترجع تانى».
واستكملت: «كل خناقة تحصل ما بينا يحرق دمى لحد ما أمسك المكنة وأحلق شعرى.. وطلعت غنيت عشان بناتى مايتعقدوش وحسستهم إنه (نيو لوك).. تخيلى قد إيه أنا تعبت، ومش بستعر من شكلى.. ولما رجعنا لبعض تانى رجعوا تانى البنات يشوفوا إنه بيتدخل فى كل شيء وإنسان معندهوش شغل».
