عقب تعرضها لموجة شديدة من التنمر .. عفاف شعيب تخرج عن صمتها وترد على منتقديها
ردت الفنانة عفاف شعيب، على الهجوم الذي تعرضت له عقب تصريحاتها بشأن شرائها جميع ملابسها من ألمانيا.
وقالت عفاف شعيب خلال مداخلة هاتفية ببرنامج "حضرة المواطن" الذي يقدمه الكاتب الصحفي سيد علي بقناة "الحدث اليوم": "الناس فاضية وقاعدين لنا على الواحدة وبيتنمروا علينا، وأنا اتكلمت بصدق شديد وما بعرفش ألف وأدور ولا أكذب ولا أجمل الكلام وصرحت بما يرضي الله وأجبت إني لما كنت بسافر كنت بجيب لبسي كله من ألمانيا، ومش أنا بس ليه ما اتكلموش على واحدة بتقول إنها بتجيب الفستان من الخارج بربع مليون جنيه".
وأضافت: "أنا بشتري اللبس الألماني لأنه اللبس الوحيد اللي بتيجي مظبوطة عليَّ ولبس شيك ومحترم، وأما مبلاقيش البدل اللي أنا عايزاها إلا في اللبس الألماني واشتريت حاجات مصري للأسف يومين والكتف اتقطع والسوستة بتاعت البنطلون اتقطعت وحاجات غريبة ومش عايزة أتكلم وأهين حد، وللأسف اللبس المصري ما بقاش كويس زي زمان، نزلت مول العرب أنا وأخويا وأولاده علشان أشتري لبس صيفي لقيناه كله لبس شتوي من السنة اللي فاتت".
وأكملت: "ليه ما بيهتموش بصناعة الملابس في مصر؟ أما اللبس الألماني مقاساتهم مظبوطة وجودتها حلوة، المصري أفضل أقلب في كل المحلات مش بلاقي الحاجة المناسبة بالنسبة لي".
وقالت الفنانة عفاف شعيب:"علشان كنت بسافر كتير فبجيب لبسي كله من بره، ودلوقتِ علشان مفيش استيراد فالواحد في حوسة من حكاية الملابس المتوفرة في السوق المحلي، وبالذات الذوق اللي بيعجبني".
وتابعت خلال لقائها ببرنامج "كلام الناس" المذاع على قناة "إم بي سي مصر": "كان فيه محل ملابس بتعامل معاه من زمان وكنت باخد منه لبس حتى قبل الحجاب فبطل دلوقتِ، فكنت وأنا محجبة بجيب كل البدل المستوردة وكلها ألماني".
ولفتت: "بحب وأنا محجبة أحافظ على أناقتي وشكلي ولبسي، وتكون منظمة، ولكن بعد الاستيراد لما اتقفل بقيت بعاني مش لاقية الهدوم الألماني اللي متعودة عليها".
