الإعلامية دعاء فاروق تتقدم ببلاغ ضد بلطجي.. تفاصيل

أعلنت الإعلامية دعاء فاروق، تقديمها بلاغًا ضد بلطجى اعتدى على زوجته وأبنائه، موضحة أن ذلك البلطجى هو زوج السيدة التى تعمل لديها بالمنزل.

وكتبت دعاء فاروق عبر حسابها على موقع فيسبوك: لحد امتى الستات هتفضل تتهان وتتمرمط ومحدش يعرف يجيب لها حقها.. رباب الست المحترمة اللى بتشتغل عندى بقالها 13 سنة ربت لى عيالى وصانت أكل عيشها معايا وحافظت على بيتى بمنتهى الأمانة، أشهد لها بالنضافة والأمانة والأدب والإخلاص والأخلاق، شقيانة طول عمرها عشان تربى بنتها وابنها أحسن تربية ومتجوزة بلطجى شمام بيضرب حشيش بفلوس شقاها وشغلها عندى.

تابعت: أنا هنزل أعمل فيه بلاغ حالا لأنه بيهددها بأنه يرمى فى وشها ماية نار الضلالى اللى سرق عفشها كله ونقله على بيت أمه، وسرق جهاز بنتها العروسة اللى غصب عنى مضطرة أقول إن أنا اللى بجهزها من عندى من المعارض سرق كل ده وطردهم من شقتهم اللى أنا آسفة إنى مضطرة أقول إنى بدفع لها إيجارها وتأمينها وبيهدد الست صاحبة البيت إنه عاوز التأمين وإلا هيفك موتور الماية وهياخده بلطجة كده.

أضافت: الست بتجيلى يوماتى جسمها أزرق من كتر الضرب اللى فى جسمها وبيكتم بقها وبيعذبها حرفيا، بياخد فلوسها يشرب بيها حشيش ويضربها، ياما قلت لها اطلقى وامشى اطلقى وسيبيله كل حاجة وامشى تقوللى أخاف ياخد منى عيالى، دلوقتى رباب فى غيبوبة سكر وعيالها كلمونى بيستنجدوا بيا ومنهارين على أمهم الشقيانة ومش طايقين أبوهم اللى راح يسحب ورق الولد من المدرسة مش عاوزه يتعلم وبيهددهم إنه هيحرق قلبهم على أمهم.. طيب يا راجل يا ضلالى ياللى سرقت عفش وجهاز بنتك اللى مراتك جايباه من شقاها أنا هعمل بلاغ رسمى للجهات الرسمية فيك وهنزل حالا أجيب حق رباب بالقانون قبل ما تتقتل فطيس.

اختتمت: هلحق الجريمة قبل ما تحصل وبالمرة هروح أعمل محضر عدم تعرض لأنه أكتر من مرة يهددها إنه هيضايقنى.. طيب يا بلطجى عصرك وأوانك أنا ببعت استغاثة للجهات الأمنية عشان أنقذ الست الغلبانة وعيالك الغلابة اللى بيكلمونى مفطورين من العياط من بطشك وظلمك وقلة أدبك.