«بالراحة على نفسكم شوية».. رولا خرسا توجه رسالة غامضة عبر انستجرام

نشرت الإعلاميه رولا خرسا عبر حسابها الرسمي صورة جديدة على موقع التواصل الاجتماعي لتبادل الصور والفيديوهات ''انستجرام''.

وعلقت على الصورة، قائلة: الحياة صعبة أوي، على كل حد والله، محدش قاعد كده في سعادة وهناء، كل نفر على الكوكب عنده مشاكل، بس الفرق بين واحد والتاني نظرته للمشاكل، فيه اللي بيواجهها ويحاول يحلها أول بأول، وفيه اللي بيهرب منها وبيقول حتتحل لوحدها، وفيه اللى بيستخبي وبيعيش في حالة ''denial''، أنا ميت فل وعشرة ومفيش مشاكل ولا حاجة، وفيه اللي بيتعايش، بيحل كل مشكلة لوحدها.

وتابعت رولا خرسا: طبعا كل واحد وشخصيته بس الحياة محتاجة مزيج من كل دا، شجاعة ومواجهة ونستخبي شوية ونهدا شوية، ومفيش مانع من شويه ''denial''، والعمل بمنطق طنش تنتعش.

بس أهم صفة على الإطلاق لازم تبقى موجودة، هي المرونة التأقلم مع الظروف، وعدم كركبة المشاكل فوق دماغك لأن لا المشاكل حتتحل ولا حتخلص.

وأضافت: بالراحة على نفسكم شوية، وعيشوا اللحظة، بكرة جاي من بتحديات مختلفة، استعدوا لها بلحظة حلوة تعيشوها دلوقتي، مخزون الذكريات هو الي بيساعدنا اما نحس ان الحلو الي محتاجينة واحشنا، على أمل إننا نعمل مخزون جديد.