حسن شاكوش يهاجم مجلس هانى شاكر: كانوا بيعاملونا كأننا حشرات

قال مطرب المهرجانات حسن شاكوش: "إننا وقعنا لنقيب الموسيقيين الفنان مصطفى كامل على إقرار انضباطي يتضمن مجموعة من المطالب ومنها الابتعاد عن أي كلمات خارجة، ومبقاش فيه حاجة اسمها مهرجانات.. كلنا هنبقى في شعبة الأغاني الشعبية وأنا بقيت مطرب شعبي، وحمو بيكا هياخد ترخيص أداء صوتي ودي شعبة جديدة".

الأداء الصوتي

وتابع خلال مداخلة هاتفية ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "الأداء الصوتي للناس اللي مبتعرفش تغني خالص زي حمو بيكا، والمطرب الشعبي زيي، وكلنا بناكل عيش، وحسينا بالحنية داخل النقابة، والفنان مصطفى كامل جمعنا ولمنا، واللي قبله كانوا بيتعاملوا معانا وكأننا مش مصريين".

مشكلة هاني شاكر

وتابع: "الفنان هاني شاكر مكنش بيجمعنا وكان صعب جدًّا اننا نوصله ومفيش فرصة يسمع شكوانا، وكأننا حشرة في المجتمع أو أننا صيع وقاعدين على قهاوي ومش ولاد ناس، وإحنا لما نقعد في البيت هنشتغل إيه وكل واحد فينا ملزوم منه 60 بيت هيأكلهم منين".