سارة نخلة: ”أنا ضد التبرع للغارمات.. إنتي راضية إن مامتك تتسجن عشان تتجوزي”
كشفت الفنانة سارة نخلة عن رفضها التبرع للغارمات، وعبرت عن استياءها من كل بنت تتسبب في وضع والدتها في موقف صعب وبعدها تستمتع بزواجها وحياتها.
ونشرت الفنانة سارة نخلة على حسابها الشخصي بموقع التواصل الاجتماعي فيس بوك: "يعني ايه اروح أتجوز وأنا عارفة أن مامتي ماضية على نفسها شيكات أو سندات أو أي حاجة ممكن توديها في ستين داهية بس عشان أنا اتجوز واتبسط وأعيش حياتي واتفشخر قدام عريسي وأهله ان مامتي جهزتني وجابتلي التلاجة والغسالة وبالشئ الفلاني".
وأضافت: "مع اني عارفة انها مش هاتعرف تسدد ديونها هو فين الإحساس والتربية والأخلاق اللي تخليني أسمح لنفسي ان مامتي يبقى اسمها من الغارمات و الناس تتبرعلها بفلوس عشان تخرج من السجن بسببي".
وتابعت: "أنا ضد التبرع للغارمات وبكره الكلمة دي وغير مقبولة تمامًا وبحتقر أي واحدة تعمل كدا في مامتها عشان تتجوز، انتي راضية ان مامتك تتسجن عشان انتي تتجوزي".
واستكملت:" دا انا لو مش هاتعب بالقرش و اموت نفسي الف مرة عشان احوش يبقى انا ما استاهلش اصلا .. ملعون ابو دي جوازة الي ممكن تخلي مامتي عليها خطر لو ١ ٪ دا الناس بتتعب و تربي عشان بس يكبروا عيالهم يشيلوهم على دماغهم و يصرفوا عليهم مش عشان يتحبسوا بسببهم .. مش قادرة اتخيل ولا افهم الناس دي بتفكر ازاي بجد ..عبث".
