هيثم عرابي يفتح النار على الأهلي بعد خماسية صن داونز

فتح هيثم عرابي مدير التعاقدات السابق بالنادي الأهلي، النار على مسؤولي الأحمر بعد الخسارة أمام صن داونز، بخمسة أهداف مقابل هدفين، في المباراة التي جمعتهما ضمن منافسات دوري أبطال إفريقيا.

وقال هيثم عرابي في فيديو مصور على موقع التواصل الاجتماعي "فيسبوك": "النادي الأهلي أهم من الأشخاص، ومش في دماغي رجوع واللي عايز يزايد يزايد".

وتابع: "الإدارة لو عايزة توصل للمستوى اللي منتظرينه من الأهلي، لازم يكون للشناوي بديل، واللي بيحصل في حراسة المرمى عليه علامة استفهام كبيرة، محتاج باك شمال بديل لعلي معلول، انت المفروض يكون عندك أجانت زي اللي شوفناهم مع صن داونز".

وواصل: "أول مرة أحس إني بتفرج على الأهلي وخايف النتيجة تزيد، ومحدش يقول الساعة تلاتة والكلام دا، ما انت لعبت بالليل واتعادل معاك في مصر، ما تعمل ماتشات ودية وتتمرن الساعة تلاتة، مش هنحط شماعات".

وأضاف: "دايما بنقول مشكلة الزمالك بيحط على الشماعات بقينا بنعمل كدة، لازم كإدارة نشوف فين الأخطاء والمراكز اللي عايزين نشتغل عليها، ومفيش مشكلة لو خرجنا من إفريقيا ونصلح الدنيا، بس مش بالمنظر دا، يا كابتن خطيب من فضلك لو سمحت بلاش طبطبة على اللاعيبة والأهلي ميبقاش بالمنظر دا".

واختتم: "احفظ قيمة التيشيرت، ومينفعش يتهان بالمنظر دا انت أحسن نادي في إفريقيا، ولازم تكون فاهم دا وتتعامل على أساسه، لازم نشتغل على حل المشاكل الموجودة في الفريق، مع احترامي إحنا لو حدفنا تلاجة هتدخل في الأهلي، إحنا وقت الجد بنقف مع النادي وانتوا بتزايدو علينا".