مدير أعمال شيرين عبد الوهاب يعلن انفصاله عنها بعد حفلها أمس
أعلن إيهاب صالح مدير أعمال شيرين عبد الوهاب انفصاله عنها، وذلك بعد نجاح حفلها الأخير الذي أقامته في جدة أمس.
وكتب إيهاب صالح في تغريدة على حسابه الشخصي بموقع التدوينات تويتر: "جمهور شيرين العظيم الحمد لله على نجاح حفل جدة كما كان متوقع، وده العادي بتاع شيري في أي حفلة، أجلت الإعلان بالقرار ده لحد بعد الحفلة، وحابب أشكركم جدًا على كم الدعم الرهيب في خلال الفترة أللى فاتت ليها في المقام الاول، وطبعا بعد كدة ليا".
وأضاف: "قررنا إن من الأفضل لينا إن نحط صداقتنا والعشرة قبل أي حاجة، وإني ابتعد عن إدارة أعمالها، وده أكيد لمصلحة الطرفين ولينا اسبابنا، مبروك وشكرا يا شيري من كل قلبي ويا رب اكون كنت على قد وعدي وكلمتي ليكي، أني دايما في ضهرك والحمد لله الدنيا دارت من أول وجديد وتكسري الدنيا حفلة بعد حفلة، وخلاص أهو الالبوم على أبواب، ومتأكد إنه هينجح نجاح غير عادي".
وتابع: "فرحان بشكل ملوش وصف بنجاحك، ورجوعك بالقوي دي وده إللي اتعودنا علية منك طول السنين دي، أنا كدة كدة دايما موجود زي مانتي عارفة، وربنا يديم كل أللى بينا على خير وأسف لو في أي لحظة كنت قصرت معاكي باي شكل، أحب اشكر كمان جمهورك اكيد إللي مشوفتش منوا غير كل خير وحب، شكرا بجد من كل قلبي، طبعا وأكيد شكر كبير لسيادة المستشار تركي ال الشيخ (أبو ناصر) على كم الدعم الكبير منوا، بمجرد إنه شاف صورة رجوعك للاستوديو وقد إيه كان مهتم بشيرين، ومقدر قيمتك وتقديرك بشكل يليق بيكي صوت إحساس العرب وده مش غريب عليه، ودايما في ضهر كل الفنانين العرب كدة كدة، دي شهادة حق لازم تتقال".
واستكمل: "ربنا دايما يحبب فيكي خلقه، ويبعد عنك أي شر بكل أشكاله ويكتبلك السعادة، أتمنى التوفيق لمديرين الأعمال الجايين، وادعمهم دايما بأي شكل أكيد عشان تفضلي دايما على القمة".
