خالد سليم يحتفل بتخرج ابنته الكبرى

حرص الفنان خالد سليم على الاحتفال بتخرج ابنته الكبرى نور، وشارك متابعيه بالصور على حسابه الشخصي بموقع الصور الشهير إنستجرام.

وكتب خالد سليم على صفحته إنستجرام: «النهاردة.. كان يوم مميز جدا ليا.. اختلطت مشاعري بشكل غريب.. بشكل عمره ما حصلي في حياتي كلها.. رغم إني ممكن في ألبوم واحد أغني أكتر من حالة ومشاعري تكون مختلفة مع كل لحن.. أو إني أدخل في فيلم أو مسلسل والشخصية يكون فيها اختلاف في المشاعر في كل مرحلة.. بس الحقيقة النهاردة أنا عشت 4 ساعات مليانين سعادة وخوف وفخر ودموع ومحبة وشجن».

وأضاف: «حفلة تخرج بنتي الكبيرة نور.. كنت سعيد إنها وصلت للمرحلة دي بكل نجاح.. وكنت خايف عليها طول ما أنا شايفها بتتحرك قدامي.. وفخور بيها وبمحبة الكل ليها وشخصيتها الحلوة.. ودموعي والمحبة والشجن كانوا بسبب الحالة اللي كل الطلبة والمدرسين والعاملين في المدرسة كانوا فيها.. إن الدفعة دي هيمشوا ويسيبوا المدرسة ويبدأوا مرحلة جديدة».

وتابع:«ألف مبروك يا نور على النجاح والتفوق والتخرج.. واعرفي إني دايمًا فخور بيكي يا حب عمري».