محمد رمضان: «خيالي كان غريب بقعد مع نفسي أشوف إيه ممكن أقابله في الرحلة وهل محتاج أسلحة»

تواجد الفنان محمد رمضان في برنامج ضيفي، وكشف تفاصيل حياته الفنية، وقال: "لما كنت أقابل مخرج ويقول لي كلمتين حلوين أشوف النجاح وأفتكر عقدة الهرم فأقول لا أنا لازم ألمس النجاح، وأمسكه بإيدي عشان أقول إني نجحت".

وتابع: "خيالي كان غريب، والوعي قبل السعي دي جملة قالها سيدنا علي، وقبل ما أتحرك لازم أفكر هل الرحلة اللي هبدأها إمكانياتي بتتوافق مع حجم طوحها ولا لأ".

وأضاف: "بقعد مع نفسي بفنجان قهوة أشوف إيه اللي ممكن أقابله في الرحلة وهل محتاج أسلحة؟ لأن الرحلة مش سهلة إحنا بنعيش مرة وأي قرار غلط ممكن يدمر سنين حياتي".

واستكمل: "كنت بشوف الأهرامات من البيت، قدامي هرم وعظمة وشيء غريب، ومرة قررت وأنا في تانية إعدادي ألمس الهرم أنا شايفه صغير وفي مخيلة طفل إن لو مشيت في نفس الطريق اللي قدامي هوصل للهرم".

واستطرد قائلًا: "الرحلة أنا مبسوط بيها جدًا بدأت من ضواحي الجيزة والمنطقة اللي أنا اتولدت فيها شكلت جزء كبير في شخصيتي وخيالي، وبيتي أبويا وأمي وإخواتي شكلوا شخصيتي ورؤيتي للمستقبل".

وأضاف: "أخويا وأختي خريجين آداب فلسفة، فعايش مع اتنين فلاسفة، والفلسفة هي البحث عن الحقيقة، فالكتب متناثرة حولي، وكنت بحب القراءة جدًا، كنت بتخليني أغوص وأعيش فيها، أخويا كان بيجب كتاب الأيام لطه حسين، وإيمان أختي كانت عاشقة للقراءة".

واختتم: "وأبويا رجل مثقف كان يقرأ الجرائد بشكل يومي، فكل ده شكل جزء كبير في شخصيتي، وحي القصبجي اللي اتولدت فيه كان 8 بيوت في المربع السكني وحوالينا زراعة، كانت منطقة ريفية بنسبة 70% وشعبية 30%".