رامي جمال: الوصول للمرتبة الثانية بعد عمرو دياب شرف كبير.. والهضبة خارج المنافسة

في تصريحات إذاعية لفتت الأنظار، عبّر الفنان رامي جمال عن احترامه العميق وإعجابه الكبير بالنجم عمرو دياب، مؤكدًا أن "الهضبة" يُعد حالة فنية نادرة يصعب أن تتكرر.

وقال رامي جمال: "عمرو دياب لا يُنافس، هو نجم صنع مجده الفني بتفرد وذكاء، وأنا شخصيًا من جمهوره المخلص، وفكرة إن حد يفكر ينافسه دي حاجة من أيام الكاسيت. وقتها، لو نزلنا ألبومات في نفس التوقيت، الناس كانت هتشتري ألبومه بنسبة 90%، وده طبيعي، لأنه كان وما زال نجم الشارع الأول".

وأضاف: "دلوقتي الدنيا اتغيرت، والناس بقت تسمع كل حاجة على السوشيال ميديا، وفعلاً لما نزلت ألبومي على يوتيوب وصلت بالمراكز الأولى، لكن لما نزل الهضبة ألبومه، بقيت في المراتب التالية وده بالنسبالي شرف. إني أكون رقم 2 بعد عمرو دياب دي حاجة أفتخر بيها ومكسب كبير".

وتابع جمال: "مش دايمًا الناس بتربط بين توقيت نزول الألبومات، في ناس بتقولي (ألبومك حلو)، حتى لو نزل مع ألبوم الهضبة. المنافسة مش دايمًا أرقام، أحيانًا بتحس إنك وصلت لمرحلة من التقدير مش محتاجة مقارنة".