شكري نجيب: الكومي باع الإسماعيلي.. والسوشيال ميديا بقت أخطر من الإدارة

فتح شكري نجيب، لاعب المقاولون العرب الحالي والإسماعيلي والاتحاد السكندري السابق، النار على منظومة الكرة المصرية، مؤكدًا أن سيطرة أندية الشركات ظلمت الأندية الجماهيرية، وعلى رأسها ناديه السابق الإسماعيلي، الذي يعيش فترة هي الأسوأ في تاريخه.

وقال نجيب في تصريحات عبر برنامج "نجوم دوري نايل" مع الإعلامي أحمد المصري، والمذاع على إذاعة "أون سبورت إف إم"، إن غياب الجماهير الحقيقية عن المشهد أفقد الكرة المصرية روحها، مطالبًا بدعم أكبر للأندية الشعبية التي طالما صدّرت المواهب والنجوم، وساهمت في قوة المنافسات والمنتخبات الوطنية.

وأضاف: "العالم كله بيتجه للأندية الخاصة، وده توجه طبيعي، لكن المشكلة عندنا إننا مش عارفين نستغل ده صح. الدعم لازم يروح برضو للأندية الجماهيرية، لأن الجمهور هو اللي بيصنع الفارق".

وتحدث نجيب عن طموحات ناديه الحالي المقاولون العرب، قائلاً: "المنافسة الموسم الجاي مش هتكون ثلاثية فقط، أندية زي سيراميكا كليوباترا والبنك الأهلي هتكون مفاجأة، والمقاولون يقدر ينافس وسط الكبار بإرثه ومكانته الكبيرة".

وعن أزمته مع نادي الإسماعيلي، كشف نجيب تفاصيل رحيله قائلاً: "قضيت 13 سنة في النادي، وكنت كابتن للفريق، لكن للأسف اضطريت أمشي بسبب المهندس يحيى الكومي ووكلاء اللاعبين، اللي كانوا بيبعوا كل حاجة في النادي لمصالح شخصية، وحذّرت وقتها إن الإسماعيلي رايح في طريق مظلم، لكن محدش سمع".

واستكمل: "الإسماعيلي عنده فلوس، لكن عنده سوء إدارة. الناس كلها بتدور على مصلحتها، ومفيش استقرار إداري ولا مالي ولا حتى فني. بعكس مثلًا ما بيحصل في المصري مع كامل أبو علي، أو في الاتحاد السكندري".

وواصل: "للأسف، بقى في لاعيبة بترفض تيجي الإسماعيلي، وده أمر عمرنا ما كنا نتخيله. السوشيال ميديا المأجورة بقت مؤثرة بشكل مرعب، وبنشوف ناس بتتنجّم على حساب ناس تانية تستحق".

واختتم نجيب تصريحاته قائلًا: "زعلان على الإسماعيلي وسمعته اللي بقت في أدنى مستوى، النادي محتاج تدخل سريع من رجال فاهمين كورة لإنقاذه، لأنه نادي كبير وطلّع نجوم وأساطير مش هيتكرروا".