محمد صلاح: المجتمع بيصعّب النجاح.. وأنا شايفه بسيط جدًا

كشف محمد صلاح، قائد منتخب مصر ونجم ليفربول الإنجليزي، عن أبرز الأسباب التي قادته للنجاح في مسيرته الاحترافية، ليصبح واحدًا من أهم اللاعبين في تاريخ كرة القدم العالمية والأوروبية. وتحدث صلاح بصراحة خلال تصريحاته لقناة "أون سبورت" مؤكداً أن التزامه ودقته في تقييم نفسه كانا مفتاح نجاحه.

وقال صلاح: "لو عايز حاجة معينة هعملها، وبتمرن مرتين أو 3 مرات في اليوم، وأنا صريح قوي مع نفسي وبحس الصح صح والغلط غلط، والصح صح حتى لو محدش عمله خالص". وأضاف: "جزء كبير من النجاح اللي وصلت له إني بكون صريح مع نفسي، ولو عملت حاجة غلط ببقى عارف إنّي عملت حاجة غلط".

النجاح بالنسبة لصلاح: السعادة أولًا

وخلال حواره مع الدكتور مجدي يعقوب، أكد صلاح أن مفهوم النجاح بالنسبة له بسيط للغاية، موضحًا: "النجاح بالنسبة لى هو الشخص السعيد في حياته وأسرته، فهذا هو النجاح". وأشار إلى أن المجتمع الخارجي يتعامل مع لاعب الكرة كلاعب فقط، سواء كان في نادٍ كبير أو صغير، بينما في مصر يتم تحميل اللاعب أعباء أكبر مما يجب.

وتابع صلاح: "على المستوى العملي النجاح إن الشخص يعمل اللي هو عايزه ويحقق فيه اللي هو عايزه، فأنا شايف النجاح بسيط بس الناس بتكلكعه".