بعد إعدام محمد عادل.. والد نيرة أشرف: «هروح لبنتي أقولها حقك رجع»
قال والد نيرة أشرف، طالبة المنصورة المقتولة على يد زميلها محمد عادل بعد تنفيذ حكم الإعدام في حق المتهم: "بنتي جاتني في المنام قبل تنفيذ حكم الإعدام بـ 24 ساعة، بس ما اتكلمتش ولا قالت حاجة، وأنا قلتلها حقك هيرجع، ومش مسامح أي حد قال كلمة في حق بنتي".
وتابع: 'أنا هروح لبنتي القبر وأقولها حقك رجع، والحمد لله كل الاتهامات اللي الناس اتهموا بيها بنتي ربنا أخد حقها وربنا ينتقم من أي حد جاب سيرة بنتي، وأسرته هما اللي عملوا كده علشان يطلعوا ابنهم على حساب سمعة بنتي".
واستكمل: "كل جمعة يزور قبر نيرة بنتي، والحمدلله ربنا استجاب دعوتي وبالأمس كنت أتمنى من الله أن يعدم، وربنا كبير واستجاب دعائي في 48 ساعة، منكم لله ومش سامح أي حد قال كلمة في حق بنتي، وهشوف فيكم يوم".
وتم اليوم الأربعاء تنفيذ حكم الإعدام في محمد عادل قاتل نيرة أشرف فتاة المنصورة في تمام الساعة التاسعة صباحا، وتم نقل جثمانه إلى المستشفى الدولي بالمنصورة.
وتعود الجريمة إلى يوم 20 يونيو 2022، عندما قرر طالب جامعي يدعى محمد عادل قتل زميلته وتدعى نيرة أشرف، أمام باب جامعة المنصورة، بسكين حاد وبطريقة انتقامية، ليتم القبض عليه.
اعترافات القاتل
وبعد القبض عليه قال في التحقيقات: "أنا لازم أخلص عليها ومخليهاش على وش الدنيا، ونزلت يوم 20 - 6 2022 ومعايا السكينة، وركبت الأتوبيس، ولقيتها قاعدة هي وزمايلها، ولما شوفتها قلت دي فرصة أن أنا أريح نفسي وأخلص منها، وهي نازلة من الباص، وأول ما نزلنا هي كانت سبقاني بشوية، وأنا نزلت وكان كل اللي في دماغي أن أروح أخلص عليها، ومشيت وراها، وأول ما قربت منها طلعت السكينة من الجراب اللي أنا كنت حاططها فيه، وشفيت غليلي منها، وفيه ناس قربوا مني علشان يحوشوني عنها، فأنا قولتلهم محدش يقرب مني، وهوشتهم بالسكينة عشان محدش يقدر يخلصها من إيدي لحد ما خلصت عليها خالص، وساعتها فيه واحد مسكني من ضهري وشالوني بعيد عنها، وده كل اللي حصل".
الحكم على المتهم
تم إحالة المتهم لمحكمة جنايات المنصورة لمحاكمته، في "23 يونيو 2022".
وفي تاريخ "26 يونيو 2022"، نظر أولى جلسات محاكمة المتهم بمحكمة جنايات المنصورة، وفي الجلسة التالية أحالت المحكمة في "28 يونيو 2022"، أوراق المتهم لفضيلة مفتى الجمهورية لأخذ الرأي الشرعي بالإعدام.
في يوم "6 يوليو 2022"، ورد رأي المفتي، وقضت محكمة جنايات المنصورة بإعدام قاتل الطالبة نيرة أشرف بإجماع الآراء.
الدفاع عن المتهم
وبالرغم من تصوير الجريمة صوت وصورة، في مشهد يدمي له القلوب، إلا أن ظهر عدد من المحامين مطالبين الدفاع على المتهم، ومن أبرزهم فريد الديب بطعن أمام محكمة النقض، لتنظر النقض الطعن بتاريخ "9 فبراير 2023"، وتصدر حكم نهائي بات برفض الطعن وتأييد حكم الإعدام.
طلب محامي الفتاة تعويض مالي لأسرتها من القاتل محمد عادل قدره 10 ملايين جنيه، وقال محامي الفتاة إن في حالة إعدام المتهم، فسيتم مطالبة والدته وأسرته بدفع المبلغ.
