زيزو: من حقي ألعب للأهلي والتاريخ مش بيتمسح

نقل الإعلامي هاني حتحوت تصريحات جديدة ومثيرة لأحمد سيد "زيزو"، نجم نادي الزمالك، كشف خلالها اللاعب كواليس جديدة حول مستقبله، وأكد التزامه الكامل بالتدريبات، ونفى التوقيع لأي نادٍ، سواء الأهلي أو غيره، مشددًا على احترامه للزمالك وجماهيره.

وقال زيزو:

"أنا بتمرن كل يوم مع الزمالك، وهاحارب لآخر وقت، وهسيب الموضوع ماشي لحد ما يخلص منهم. لو الأمور تمّت، خير وبركة، وأنا بحترم النادي وأكل عيشي، وهفضل أتمرن لحد آخر لحظة ليا داخل النادي، سواء بعد كام شهر أو لو مددنا العقد."

ونفى اللاعب بشكل قاطع ما تردد عن توقيعه للنادي الأهلي، موضحًا:

"قصة التوقيع للأهلي؟ لم أوقّع للأهلي، وماليش دعوة بابا وقع على إيه أو خد شيكات ولا لأ. لو كنت خلصت فعلاً، كنت هسافر جنوب أفريقيا 17 ساعة وأقعد بين اتنين معرفهمش؟ كنت همسك رجلي وأقول عندي إصابة؟ أنا فعلاً رجلي وجعاني، وأنا أكتر لاعب شارك في المباريات، وبحتاج راحة 3 أسابيع على الأقل، غير ركبتي اللي مبعرفش أطلع السلم منها."

وتابع نجم الزمالك:

"الأهلي نادي محترم، ومن حقي ألعب لأي نادٍ، لكن التاريخ مش بيتشال. طلبت من الزمالك شيكات مكتوبة علشان أضمن حقي، لأن العقد شريعة المتعاقدين. هل ده شيء غير طبيعي؟ هل أي وعد ممكن يختفي بدون ضمان؟"

وعن واقعة شخصية مرّ بها، قال زيزو:

"عربيتي كانت هتتسرق من داخل النادي، وحصلت فيها حادثة. ممدوح عباس قالي متعملش محضر، والعربية دخلت التوكيل وكان المفروض هو يدفع، لكني روحت دفعت 3 مليون جنيه من جيبي علشان أخلص الموضوع. وممدوح عباس قال لي: لما زيزو يخلص قصته مع الزمالك."

واختتم تصريحاته بالتأكيد على أنه لن يوقع لأي نادٍ قبل حسم موقفه مع الزمالك:

"مش هامسك ورقة وأمضي غير لما أحسم موقفي مع الزمالك. مفيش حاجة اسمها توكيل عام في عقود الكورة، ممكن في الإعلانات أو العقود التجارية، لكن في الكورة لا."