إبراهيم حسن: «اشتغلنا في فرن عيش بـ15 قرش علشان استمارة الأهلي.. ووفاة والدي كانت أصعب لحظة»
تحدث إبراهيم حسن، مدير منتخب مصر، عن كواليس رحلته الإنسانية والكروية مع شقيقه التوأم حسام حسن، مستعيدًا ذكريات البدايات الصعبة والطريق الطويل نحو النجومية داخل النادي الأهلي.
وقال إبراهيم حسن في تصريحات تليفزيونية عبر قناة "أون سبورت": "احنا أصغر اتنين في العيلة وتوأم، وعلشان كده كنا دايمًا مع بعض، وإخواتنا كانوا بيساعدونا وبيخافوا علينا".
وأضاف: "والدي الله يرحمه توفي واحنا صغيرين أثناء وجودنا في اختبارات الأهلي، وفي شهر رمضان، وتوفى بعد ما نجحنا ودخلنا الأهلي ومشافناش بنلعب هناك".
وتابع: "العيلة كلها كانت أهلاوية، لكن فكرة إننا نلعب كرة أصلًا ماكنتش في بالهم، وروحنا الاختبارات من غير ما نقول لحد، وخبينا الموضوع عنهم لحد ما نجحنا، وساعتها قولنا لهم وكانوا فرحانين جدًا".
وكشف إبراهيم حسن عن تفاصيل مؤثرة من تلك الفترة، قائلاً: "فلوس الاستمارات كنا بنجمعها في الإجازة، واشتغلنا إحنا الاتنين في فرن عيش، كنا بنقبض يومية بـ15 قرش وربع جنيه، لحد ما جمعنا فلوس الاستمارة، وكنا مش عايزين نقلق أهلنا لأنهم كانوا خايفين علينا نروح وسط القاهرة".
واستكمل: "الفترة كلها كانت في رمضان، وكنا بنلعب، وفي اليوم الأخير من التصفيات النهائية اتأخرنا، وقلبوا علينا الدنيا، ورجعنا البيت وإحنا خايفين، ولما قولنا لهم إن معانا الكارنيه الأمور هديت".
واختتم إبراهيم حسن تصريحاته قائلًا: "كنت زعلان جدًا إني ألعب في مركز الظهير، وقلت للكابتن عبد العزيز عبد الشافي إن الكابتن طعيمة قال هألعب باك يمين، وكنت مش عايز المركز ده، لكن هو كان شايف حاجة تانية، وفعلاً كان عنده رؤية صح، ولعبت في المنتخب والفريق الأول، ولعبت في جميع مراكز الملعب".
